“Anadolu litosfer tavasının Türkiyədə baş verən dağıdıcı zəlzələlərdən sonra üç metr irəlilədiyi təxmin edilir. Lakin bu, son hesablama deyil”. JAMAZ.İNFO xəbər verir ki, bu sözlərin müəllifi İtaliyanın Milli Geofizika və Vulkanologiya İnstitutunun rəhbəri, professor Karlo Doglionidir.
Professor qeyd edib ki, təkanlar Anadolu və Ərəb litosfer tavalarının qovşağında qeydə alınıb.“Anadolu tavası həm yer qabığına, həm də Avrasiya və Ərəbistan tavasına münasibətdə cənub-qərb istiqamətində hərəkət edir. Əslində, hər gün bir neçə mikron hərəkət edir. Amma ilin sonuna qədər artıq bir neçə santimetr görünür”.
Doglioni, fevralın 6-da Türkiyədə baş verən ən güclü zəlzələlərin episentrinin düşdüyü nöqtəyə diqqət çəkib. “Bu nöqtədə onilliklər boyu davam edən enerji yığılması var idi. Bu nöqtə artıq enerji saxlaya bilmədiyi üçün Anadolu tavasının hərəkəti fonunda enerji ayrılır”.
Professor qeyd edib ki, Anadolu tavasının tam olaraq necə yerdəyişməsi ilə bağlı dəqiq məlumatların səslənməsi hələ də çətindir. İnstitut rəhbəri qeyd edib ki, peyk məlumatları alınan zaman daha dəqiq göstəricilər peyda olacaq və hazırda seysmik məlumatları tərsinə çevirib onlardan yerdəyişməni hesablamaq mümkündür. “Bizim hesablamalarımıza və ABŞ Geoloji Xidmətinin ilkin hesablamalarına görə, bu seqment boyunca sürüşmə 3 metr idi. Lakin sonra çat genişləndi və yerdəyişmə davam etdi. Mütləq yeni məlumatlar olacaq”.
