“Əgər biz təklif etdiyimiz varianta uyğun olaraq sülh müqaviləsi bağlasaq, o zaman mümkün təxribatların qarşısını almaq üçün imkan yaradırıq. Sülh müqaviləsinin mətnində bizim təklif etdiyimiz mexanizmlər də təminat yaradır, məsələn, beynəlxalq qarantlardan danışırıq. Bu qarantların kim olacağı hələ bəlli deyil, bu, danışıqların mövzusudur. Ermənistan bilir ki, bu zəmanətlər tarix boyu heç də həmişə işləmir, lakin belə hallar ola bilər”. JAMAZ.İNFO xəbər verir ki, bu sözləri Ermənistan Təhlükəsizlik Şurasının sədri Armen Qriqoryan deyib.
O, sülh müqaviləsi variantlarına da toxunaraq qeyd edib ki, Ermənistan bütün platformalarda eyni şeyi deyir və eyni gündəliyi təbliğ edir. Onun sözlərinə görə, prosesin hansı platformada getməsi ilə bağlı heç bir fərq yoxdur. Qriqoryan xatırladıb ki, Azərbaycan sülh müqaviləsinin 5 bəndini, sonra daha ətraflı mətni təqdim edib. “Biz bu mətn üzərində işlədik, bu suala cavabımız var, ona çərçivə sazişi formasını verdik və onun əsasında noyabrın 7-də Vaşinqtonda xarici işlər nazirlərinin görüşü keçirildi. Bu mətn, məncə, əhatəlidir və Ermənistanla Azərbaycan arasında mövcud olan problemləri həll edə bilər. Sülh prosesinin çərçivəsi, məsələlər, çalışacağımız istiqamətlər getdikcə daha dəqiqləşir”.
Rusiyanın təkliflərinin etibarlı olub-olmaması ilə bağlı suala Armen Qriqoryan bildirib: “Ermənistanın konkret mövqeyi var idi ki, bu təkliflər Soçi bəyanatında göstərilməlidir, lakin onlar yekun mətndə qeyd olunmayıb. “Gəlin işləməyə davam edək. Ümumiyyətlə, bu təkliflər bu dövrdəki proseslərlə uzlaşır. Qlobal miqyasda bu mətnlər bir-birinə bağlıdır”.
Onun sözlərinə görə, Ermənistanla Azərbaycan arasında 4 böyük mövzu var ki, onların da alt mövzuları var. “Birincisi humanitar məsələlər, bütün hərbi əsirlərin tezliklə azad edilməsi, ikincisi nəqliyyat blokunun açılması, daha sonra delimitasiya, sərhədlərin təhlükəsizliyi və Dağlıq Qarabağ probleminin həlli üzrə komissiyaların işidir. Təbii ki, danışıqlarda Qarabağ məsələsi müzakirə olunur, biz irəliləyişlə bağlı mümkün həll yollarını axtarırıq. Məsələni gələcəyə buraxmaq, ya da Dağlıq Qarabağla Azərbaycan arasında hüquq və təhlükəsizliyin müzakirəsi üçün beynəlxalq mexanizm yaratmaq variantı var. Dağlıq Qarabağ problemini həll etmədən, heç olmasa Qarabağ probleminin necə həll olunacağına aydınlıq gətirmədən sülh müqaviləsi bağlamaq mümkün deyil. Qarabağ problemindən yan keçmək mümkün deyil, bütün iclaslarda müzakirə olunur, gündəmdədir”.
Eyni zamanda, Təhlükəsizlik Şurasının katibi əlavə edib ki, hazırda Qarabağ məsələsini sülh müqaviləsi prosesindən necə ayırmaq barədə müzakirələr gedir. “Çünki uzun müddətdir ki, Qarabağ probleminin sülh sazişinin tərkib hissəsi kimi, prosesin bir hissəsi kimi həlli yolu tapılmayıb. İndi biz mövzuları məhdudlaşdırmağa çalışırıq, lakin bunun üçün zəmanətlər lazımdır. Zəmanət olmadan bunu sülh müqaviləsində əks etdirməmək mümkün deyil”.
