Kiyev Rusiya ordusu barədə ciddi səhvə yol verir – Ukraynalı general
Kiyev Rusiya ordusunun potensialını, hərbi ehtiyatlarını və hərbi sənayenin imkanlarını dəyərləndirərkən ciddi səhvə yol verir.
Jamaz.info xəbər verir ki, bu barədə Ukrayna Silahlı Qüvvələrinin keçmiş baş komandanı, general Viktor Mujenko Ukraynanın “Faktı” nəşrinə müsahibəsində bildirib.
General silahların, hərbi texnika parkının artırılması və yeni hərbi birləşmələrin və qrupların yaradılması baxımından RF Silahlı Qüvvələrinin imkanlarının real qiymətləndirilməsinə çağırıb. O, Moskvanın böyük hücuma başlamayacağına inanan ukraynalı analitiklərlə də mübahisə edib və belə bir fikri “səthi” adlandırıb.
Mujenko öz mövqeyini dəstəkləyərək xüsusi hərbi əməliyyatda iştirak edən Rusiya qoşunlarının sayının 526 min nəfər olduğunu qeyd edib.
General Rusiyanın qoşunları texnika ilə təmin etmək imkanlarına da işarə edib. O iddia edir ki, Rusiya hər gün 10 tankı, yəni ayda 300 ədəd hərbi texnikanı bərpa edə və ya istehsal edə bilər.
Mujenko Rusiya Müdafiə Nazirliyinin kollegiyasının 2022-ci ilin dekabrında keçirilən iclasını xatırladıb. Həmin iclasda 2026-cı ilə qədər daha 20 yeni diviziyanın yaradılması planları açıqlanıb. Onun fikrincə, onlar mövcud briqadaların bazasında yerləşdiriləcək, təxminən 8-10 diviziya yaradılacaq. Lakin onlara hansı vəzifələr tapşırılacağı məlum deyil.
Onun fikrincə, yazda cənub-şərqdə Kupyansk, Oskol, Liman, Avdiivka və Vuqledarda döyüşlər davam edəcək ki, bu da eskalasiyaya şərait yarada bilər. Hazırda Ukrayna Silahlı Qüvvələri Kupyanskdan Dnepr çayının ağzına qədər cənub-şərq istiqamətində strateji müdafiəni həyata keçirir, həmçinin Bryansk, Kursk, Belqorod, Voronej istiqamətlərində rus qoşunlarının qruplaşmalarına və Belarusdakı qoşunlara nəzarət edir.
Mujenko daha əvvəl bildirmişdi ki, Rusiya 2025-ci ilə qədər Ukraynanın sağ sahilindəki ərazilərinə nəzarəti ələ keçirə bilər. Onun sözlərinə görə, siyasi razılaşmalar əldə olunmasa, bu baş verə bilər. O, münaqişənin uzun müddət davam edəcəyinə inandığını bildirib.(publika)
