Sosial
“Sosial Tədqiqatlar Mərkəzi” 2 milyona 2 mərtəbəli ofis tikir
“Sosial Tədqiqatlar Mərkəzi” Publik Hüquqi Şəxs tərəfindən keçirilən tender müsabiqəsinin (Təkliflər sorğusu) qalibi məlum olub. JAMAZ.İNFO yeniavaz-a istinadla xəbər verir ki, tenderin qalibi “TVM İnşaat” MMC (VÖEN- 1101408601) olub.
MMC tender şərtlərində göstərilən işlərin həyata keçirilməsi üçün “Sosial Tədqiqatlar Mərkəzi”ndən 1 milyon 810 min manat alacaq. Tikinti işlərinin bu ilin iyul ayında başladığı və ilin sonunda başa çatacağı bildirilir.
Məlumat üçün bildirək ki, “TVM İnşaat” MMC 25.07.2016-cı il tarixində dövlət qeydiyyatına alınıb. Nizamnamə kapitalı 10 manat olan şirkətin hüquqi ünvanı “Bakı şəhəri, Qaradağ rayonu, Müşfiqabad qəsəbəsi, ev 3D, m. 8” olaraq göstərilir. MMC-nin qanuni təmsilçisi Ağayev Musa Nizaməddin oğludur.
Onu da bildirək ki, millət vəkili Zahid Orucun rəhbərlik etdiyi “Sosial Tədqiqatlar Mərkəzi”nə inzibati bina tikdirməsi üçün 2019-cu ildə Bakı Şəhər Memarlıq və Şəhərsalma Baş İdarəsi tərəfindən icazə verilib.
“Yasamal rayonu, İsmayıl bəy Qutqaşınlı küçəsi, 18” ünvanında tikiləcək inzibati binanın 2 mərtəbəli olması nəzərdə tutulub. Binanın ümumi sahəsi isə 2091,3 kv. metr olacaq.
Rəqəmlərdən də göründüyü üçün obyektin 1 kv. metrinin tikintisi 866 manata başa gələcək.
