Hazırda Yaponiyada səfərdə olan Ermənistanın prezidenti Armen Sarkisyan təcili geri dönməyi qərara alıb. JAMAZ.İNFO xəbər verir ki, Ermənistan prezidenti bu addımını görüşlərini yekunlaşdırmaqla izah etsə də, təcili geri dönüşünün sərhəddə baş verənlərlə bağlı olduğu iddia olunur.
Bu əsnada, Armen Sarkisyan Ermənistanın Kəlbəcər istiqamətində törətdiyi təxribata da münasibət bildirib. Daha doğrusu, bununla bağlı bəyanatla çıxış edib. O bildirib ki, Azərbaycan-Ermənistan sərhəddində baş verənlər “Azərbaycanın təxribatıdır”. Eyni zamanda, orduya və əhaliyə müraciət edib. “Əmin olun ki, Ermənistan silahlı qüvvələri düşmənə layiqli cavab vermək gücündədir. Azərbaycanın təxribatlarına bütün istiqamətlərdə cavab verməyə hazırdır. Ona görə də, orduya, ölkənin təhlükəsizliyi, sərhədlərin qorunması ilə məşğul olan bütün dövlət qurumlarına və əhaliyə çağırış edirəm ki, onlarla birlikdəyəm və dəstək verirəm”.
JAMAZ.İNFO bildirir ki, Ermənistanın sabiq baş qərargah rəisi, general Movses Akopyan da baş verənlərlə bağlı danışıb. O deyib ki, faktiki hadisələr genişmiqyaslı müharibəyə gətirib çıxarmayacaq.
Qeyd edək ki, Akopyan bir neçə gün əvvəl Yerasx (Arzadəyən) qəsəbəsi ətrafında baş verənlərə münasibət bildirərkən, Azərbaycanın Ermənistana qarşı başqa bir istiqamətdən təzyiq göstərəcəyini, yeni münaqişə ocağının yaranacağını demişdi. Həmin ocağın Kəlbəcər istiqaməti olması barədə verilən suala erməni general “yox hələ” deyə cavab verib. Lakin o, yeni gərginlik ocağı barədə danışmaq istəmədiyini bildirib.
