Milli Məclisin deputatı, Mətbuat Şurasının üzvü olan Cavanşir Feyziyev Azərbaycanın tanınmış jurnalistlərini təhqir edib. JAMAZ.İNFO AFN-ə istinadən xəbər verir ki, bir neçə gündür media və sosial şəbəkələrdə deputat Cavanşir Feyziyev və ailəsinə məxsus London məhkəməsində müsadirə olunan 5 milyon funt-sterlinq müzakirə olunur. Maraqlıdır ki, C.Feyziyev məsələ ilə bağlı səhəri gün müsahibə verərək məlumatı təsdiqləsə də, yenidən geniş açıqlama yayıb. Həmin açıqlamada isə onunla bağlı xəbərləri ictimailəşdirən bir neçə tanınmış jurnalistin adını çəkərək onları təhqir edib. Jurnalistlər də öz növbəsində ona cavab veriblər.
C.Feyziyevin təhqir dolu yazısını və ona verilən cavabları təqdim edirik:
“Əziz dostlar,
Keçən həftə London məhkəməsinin qərarı ilə ailə üzvlərimin bank hesablarında olan 15 milyon funt-sterlinqin 10 milyonu sərbəst buraxıldı. Bu məbləğin qanuniliyinin London məhkəməsi tərəfindən tanınması ilk növbədə Azərbaycanda biznes mühitinin və qazanılan vəsaitlərin qanuniliyinin və şəffaflığının göstəricisidir.
Bildiyiniz kimi, vaxtilə Beynəlxalq Bankın əməliyyatlarında baş vermiş qanunsuz hallar Azərbaycan hüquq-mühafizə orqanları tərəfindən araşdırılıb və orada cinayət əməlinin törədilməsi sübut olunub. Buna görə də qalan 5 milyon məbləğin vaxtilə məhz Beynəlxalq Bank vasitəsilə köçürülməsi həmin məbləğin müsadirə olunması ilə nəticələndi. Bunun qarşısını almaq mənim iradəmdən kənarda idi. Britaniya məhkəməsinin qərarında da, Britaniya mətbuatında da mənim və ailə üzvlərimin hər hansı qeyri-qanuni hərəkətə yol vermədiyimiz ayrıca qeyd olunub. Azərbaycan mətbuatında isə bütün bunlar təhrif olunmuş şəkildə təqdim edildi.
– Ailə üzvlərimin hesablarındakı vəsaitlərin mənbəyi nədir?
Bu vəsaitlər 1987-2010-cu illər ərzində mənim təsis etdiyim, həmtəsisçisi və ya direktoru olduğum şirkətlərdən qazanılıb. Həmin şirkətlər ölkənin iri vergi ödəyiciləri olub və büdcəyə öz layiqli töhfələrini veriblər. Bu şirkətlərdə ölkənin bütün bölgələrindən minlərlə vətəndaşımız çalışıb, özünün və ailəsinin layiqli həyatını təmin edib. Bu şirkətlər dünyanın ən nüfuzlu şirkətləri ilə əməkdaşlıq edib, Azərbaycanın yeni yaranmaqda olan biznes mühitinə müasir davranış qaydaları və iş üslubu gətirib. Gördüyüm bütün işlərlə və birgə çalışdığım bütün insanlarla həmişə fəxr etmişəm və bu gün də onların hamısını hörmətlə xatırlayıram.
Mən orta maddi səviyyəli müəllimlər ailəsində böyümüşəm, ancaq zəngin olmadığımız üçün heç vaxt heç kimi günahkar hesab etməmişəm. Qarşıma qoyduğum məqsədlərə sadəcə düzlüklə, vicdanla və əzmkarlıqla işləyərək çatmışam. Heç kimdə günah axtarmadan, heç kimi suçlamadan.
Beləliklə, sözügedən vəsaitlər mənim 20 ildən çox müddətdə özəl biznes sahəsində əldə etdiyim şəxsi qazancımdır, mənə və ailəmə məxsusdur. Mənim bu vəsaitləri istənilən ölkədə istənilən biznesə sərmayə olaraq yatırmaq hüququm var.
Orta savadı olan adam üçün burada başa düşülməyəcək bir şey yoxdur. Amma qaragüruh təmsilçiləri bunu anlamadan və ya anlayaraq qəsdən ünvanıma “korrupsioner”, “xalqın pulunu talayan” və s kimi özlərinə yaraşan nalayiq ifadələr işlədiblər. Bütün bunlara həmişə təmkinlə yanaşmışam. Çünki anlayıram ki, adətən, belə adamlar öz uğursuzluqlarının səbəbini özlərində deyil, məhz onlardan daha uğurlu olanlarda görürlər. Ailələri, övladları onlardan vicdanla, namusla pul qazanıb ailəni təmin etməyi gözlədikləri halda onlar öz qabiliyyətsizliklərini bizim kimilərini söyməklə ört-basdır etməyə çalışırlar.
Ünvanıma səslənən əsassız, vicdansız tənqidlərin və təhqirlərin müəlliflərini də yaxşı tanıyıram.
Bunların bir qismi – Əli Kərimli, Qubad İbadoğlu, Cəmil Həsənli, Arif Məmmədov, Bəxtiyar Hacıyev, Tofiq Yaqublu, Aslan İsmayılov, İlqar Məmmədov kimiləri və onların altında sıralanan, ömründə bir kitabı belə oxuyub başa çatdırmamış, amma başlarından böyük siyasi iddiaları olan özündən müştəbeh siyasi şarlatanlardır.
Onlar özlərini “siyasətçi” və ya “bloqer” adlandırsalar da, əslində cəmiyyətdə hər hansı siyasi mənsəbə çatmaq naminə ermənilərlə əl-ələ verib Azərbaycana və onun təmsilçilərinə qarşı beynəlxalq miqyasda qarayaxma kampaniyası aparan milli satqınlardır. Lümpen proletar düşüncəsinə malik olan bu adamlar sadə insanları halal əməklə pul qazanıb zənginləşməyə yox, proletar inqilabı etməyə və 100 il əvvəl olduğu kimi xalqın imkanlı və ziyalı adamlarını öldürüb qarət etməyə çağıranlardır. Onlar anlamırlar ki, bunu bir daha yuxularında da görə bilməyəcəklər.
Digər bir qismi rahat qazanc və ya Avropada sığınacaq və maddi yardım almaq naminə özlərini xarici kəşfiyyat qurumlarına təslim etmiş və etdikləri cinayətin məsuliyyətindən rahat yaxa qurtarmaq üçün “jurnalist” və ya “siyasi fəal” adları altında müxtəlif beynəlxalq QHT-lərin donuna geyinmiş və onların köməyi ilə toxunulmazlıq statusu əldə etməyə çalışan agentlərdir. Qənimət Zahid, Xədicə İsmayıl, Sevinc Osmanqızı, Həbib Müntəzir, Sevinc Telmanqızı, Ləman Ələşrəfqızı, Osman Gündüz, Rauf Arifoğlu, Bahəddin Həziyev və sairləri də yaxşı yaşamaq üçün vicdanlı əməyi yox, cəsusluq, donosçuluq, sabotajçılıq və böhtançılıq kimi şərəfsiz vəzifələri öz üzərlərinə götürüblər.
Digər bir qismi isə gündəlik həyatda hamımızın tez-tez rastlaşdığımız adi dələduzlardır. Bunlar ölkəmizdə İnformasiya texnologiyalarının geniş yayılması və dövlətin onlara verdiyi sərhədsiz azadlığın bəhrəsindən ilk növbədə öz çirkin məqsədləri üçün yararlanırlar. Hərəsi bir smartfonda sayt idarə edən və ya özünə “Youtube” kanalı açan bu psevdo-jurnalistlər yüksək vəzifəli dövlət məmurları və deputatlarla yanaşı həm də imkanlı iş adamlarını hədəfə alan və müxtəlif şantaj üsulları ilə onlardan pul qoparmağa çalışan reketlərdir.
Bu siyahıya tüfeyliliklə məşğul olan, cibgirlik, oğurluq, reketçilik, şər-böhtan və s. üstündə həbsdə yatıb-çıxmış Əvəz Zeynallı, Eynulla Fətullayev, Xədicə İsmayıl, Xalid Kazımlı kimi stajlı dələduzlarla yanaşı bu yolda hələ kövrək addımlarını atan və hələ Kürdəxanı “ziyarətinə” gedib çata bilməmiş Zaur Qəriboğlu, Məhəmməd Ərsoy, Elçin Zahiroğlu, Şahin Əhmədov, Elnur Məhərrəmli kimi çoxsaylı nisbətən gənc dələduzlar da daxildir.
Əziz dostlarım və izləyicilərim,
Qazandığım bütün vəsaitlər şəffaf və qanuni yolla əldə edilib, vergiləri ödənilib, şəxsən mənə və ailə üzvlərimə məxsusdur. Buna görə mənim yuxarıda sadaladığım siyasət və məişət dələduzlarına heç bir hesabat vermək məsuliyyətim və fikrim yoxdur. Belə adamların yaydığı qərəzli və saxta xəbərlərə görə narahat olub mənə dəstək mesajları göndərən, telefon açan, narahatlığını bildirən bütün dostlarıma minnətdarlığımı bildirirəm və ən xoş arzularımı çatdırıram”.
***
Yazıda adı çəkilən jurnalist Sevinc Telmanqızı deputata sərt cavab verib. Onun cavabını təqdim edirik: “Biri o Cavanşir Feyziyev adlı Londonda yolunmuş qaza xatırlatsın ki, bir də başından böyük danışıb, mənim adımı ağzına almasın. Bütün ölkə onun şərəfsiz fəaliyyətindən danışır, bu, utanmadan ölkədə qələmi ilə, vicdanı ilə fəaliyyət göstərən mənə ağız atır. (onu tənqid etmiş jurnalistlərə şərəfsiz fəaliyyətlə məşğul olanlar deyib) Məhkəmə qərar çıxarıb, mən də xəbərini oxuyub, şərhini vermişəm. Uduzduğu pulun acısını bizdən çıxarmağa çalışır deyəsən. Sənin pulunu Conlar yeyib eee, nə bizə diş qıcayırsan? Hajı dayının uğursuz versiyası, Azərbaycanın üz qarası!”.
***
Jurnalist Ləman Ələşrəfqızı deputata cavabında yazıb: “Başım qarışıq olub bu gün, facebooka indi girirəm. Baxıram ki, deputat Cavanşir Feyziyev mən də daxil bir neçə jurnalisti təhqir edib, xarici kəşfiyyata işləyən, şərəfsiz və s. adlandırıb. Niyə, nə üçün? Çünki Britaniya məhkəməsinin çıxardığı qərarı efirimizdən səsləndirmişik, bu pulların ölkədən necə çıxarılmasından danışmışıq, şərh vermişik. Əcəb eləmişik! Zatən jurnalistikanın işi bu! Hansı şərəfdən danışırsız, ay yoldaş deputat? Şərəfi olan sizin kimi saxta yolla gedib parlamentdə oturmur. Şərəfi olan millətin pulunu oğurlayıb ingilisə yedirtmir! Sən o adamsan ki, bir ayağı amputasiya olunmuş , bir ayağı qanqrena vəziyyətdə olan əlilə kömək etmədin, dedin mən deputat maaşı ilə yaşayıram, amma milyonlarla funt sterlinqi ingilisə yedirdirsən.
Bax, bu, ilahi ədalətdir! Bir yetimə, əlilə dərman pulunu qıymayan adama Allah belə rüsvayçı aqibəti yaşadır.
Qaldı, xarici kəşfiyyat, agent-filan sayıqlamarına… Yeddi arxa dönənini xaricdə bəsləyən sənsən. Agent də, casus da sizdən çıxar. Biz özünüz demiş, çörəyimizi bir smartfondan çıxaran adamlarıq. Amma bu daha şərəfli çörəkdir. Qətiyyən yaddan çıxarmayın”.
****
“2019-cu ilin axırında özünü buraxıb 2020-ci ilin əvvəlində yenidən deputat olan Cavanşir Feyziyev mən də daxil olmaqla bir sıra media mənsublarının ünvanına özünə yaraşan, özünə aid olan ifadələr işlədib. O ifadələrin hamısını eynilə Cavanşir Feyziyevin özünə göndərirəm”. Bu fikirləri isə yazıda adı çəkilən “Bizim yol” qəzetinin baş redaktoru Bahəddin Həziyev bildirib.
O, daha sonra qeyd edib: “Biz media olaraq Cavanşir Feyziyevin ailəsinə məxsus milyonlarla funt strelinq vəsaitin müsadirə olunması ilə bağlı London məhkəməsinin qərarı haqda da məlumat vermişik. Sonra məhkəmə öz qərarını bir hissədə geri oxuyub, onu da yazmışıq. Heç bir böhtana, təhqirə, qərəzə də yol verməmişik.
Buna baxmayaraq, mənim də adımı hallandıraraq, özünə “ziyalı” deyən bir şəxsə, deputata yaraşmayan leksikondan istifadə edib. Bəzi adamlar dilinin arxasında gizlənir. O cümlədən, qələminin. Bu dəfə Feyziyev dilinin, daha doğrusu, klaviaturasının arxasında gizlənməyə çalışsa da, Avstraliya səhralarındakı o böyük, məşhur quşun durumuna düşüb. Dəvəquşu kimi başını quma soxanlar gizləndiyini zənn edərlər, ancaq arxaları bayırda qalar.
Əslində o deputat bizim adımızı çəksə də, özü haqqında yazıb. Qələmindən başqa heç nəyi olmayan jurnalistləri də ağır cinayətlərdə ittiham edib. Təsəvvür edin: Azərbaycan Qarabağın bərpası, ümumiyyətlə, ölkənin inkişafı üçün xaricdən sərmayələr tapıb gətirməyə çalışarkən, dövlətin üst səviyyələrində olanlar, o cümlədən, deputatlar Azərbaycandan qapdıqları milyonları xaricə çıxarır. Burda Azərbaycan xalqının canından qoparıb yığdığı pulları öz ölkəsinə deyil, xaricə yatıran adam çıxıb da ömrünü, sağlamlığını vicdanlı sözə həsr etmiş bizə “sabotajçı”, “agent” və sair deyə ittiham irəli sürür və ürəyi də soyumur, təhqir edir. Kimdir agent, kimdir sabotajçı və sair, nəinki Azərbaycan xalqı, bütün Dünya gördü. Təbii ki, onu məhkəməyə verə də bilərik, bizi ağır cinayətlərdə ittiham etdiyini isbatlamasını tələb edə bilərik. Ancaq bu, o deputat üçün böyük şərəf olar; əskiyini tamamlamış olarıq. Vicdanı varsa, saytımızda axtarış aparsın, görsün ki, onun saytımızda, səhifəmizdə nə qədər yazıları, xəbərləri dərc olunub. Heç bir təmənna güdmədən, heç bir qarşılıq gözləmədən. Yəqin yadından çıxıb, bizim elektron poçtumuza yazı göndərib, sonra da ardınca zəng edib xahişdə bulunduğu. Ancaq nə mən, nə mənim iş yoldaşlarım bunun qarşılığında nə ondan bir xahiş etmişik, nə bir təmənna gözləmişik. Cavanşir Feyziyev, bizim qəzetimizdə, saytımızda məqaləniz dərc olunmasını özünüzə şərəf bildiyiniz günləri unutmusunuz. Kimlərəsə nəyinsə qarşılığında nəsə yazdırıb-pozdurmağa bəlkə o qədər alışmısınız ki, hamını o arşınla ölçürsünüz. Sizə, sadəcə olaraq, ayıb olsun! Mənim adım heç bir murdar ağızda ləkələnməz. Bunu da bilin. Şərəfi olan kəs hamını bir-birinə qatıb şərəfli qələm əhlinə böhtan atmaz, özünə aid olan ifadələri başqasının ünvanına sərf etməz. “Bizim Yol” və Bahəddin Həziyev olaraq haqqımı Sizə halal etmirəm. Haqqımızda nə demisinizsə, özünüzə “hədiyyə” edirəm. Və yazdığınız o mənfur statusu silib bütün Azərbaycan mediasından üzr istəməyinizi tələb edirəm. Dövlətin müvafiq səviyyələrdə bu hərəkətinizə reaksiya verməyini də gözləyirəm. Çünki Cavanşir Feyziyev olaraq Siz namuslu qələm adamlarını da xarici kəşfiyyata işləyən, agent və sair adlandırırsınız. Bunlar ağır dövləti cinayətlərdə ittiham etməkdir. Bu ittihamları irəli sürən, sona qədər getməli və sübuta yetirməlidir. Kişi sözünü sonuna qədər deyər. Bizimlə bağlı o ittihamlarınızı sübut edə bilməyəcəksinizsə, bunları söyləmək heç bir insanlığa, heç bir mənəvi ölçülərə sığmaz. Biz, əlbəttə ki, dövlətin reaksiyasını gözləməklə yanaşı, öz hüquqlarımızı bütün qanuni vasitələrlə qorumaq haqqını da özümüzdə saxlayırıq.
Bu arada deputat Cavanşir Feyziyevin ölkə mediasının nümayəndələrinə, o sırada mənə ünvanlanmış aşağılıq paylaşımını dərc edən, sonra da silən media orqanına da mən öz etirazımı mədəni şəkildə bildirmişəm. Peşə həmrəyliyi Jurnalistlərin Peşə Etikasının ən aparıcı müddəalarından biridir. Bu, jurnalistikanın şərəfidir. Kiminsə sifarişi və ya göstərişi ilə bilərıkdən və ya bilməyərəkdən öz qələm yoldaşlarını, bütün medianı ən ağır formada təhqir, təhdid və ağır cinayətlərdə ittiham etdirmək heç bir yazılmış və yazılmamış qanuna sığmır. Kiminin…
Bəli, Cavanşir Feyziyev kimi böyük varidatı olar, kiminin də şərəfi. Hansısa maddi və sair maraqlara görə şərəfli insanları da ləkələmək nə deməkdir?! Adını özünüz qoyun.
Sonda mən Azərbaycan Respublikasının rəhbərliyinə, Baş Prokurora, Milli Məclisin sədrinə müraciət edirəm: bir polis işçisinə zor tətbiq edən, təhqir edən Eldəniz Səlimovun hərəkətinə necə operativ və ədalətli hüquqi və siyasi qiymət verilibsə, bütün Azərbaycan mediasını, bürün jurnalistləri ağır formalarda təhqir, təhdid və ittiham etmiş Cavanşir Feyziyev də deputat mandatından edilməli və barəsində hüquqi ölçü götürülməlidir. Bu hərəkətə dövlətin adekvat qiymət verməsini gözləyirəm”.
